Sraith raidió

Sa tsraith seo, Scéal na Comhdhála, arna léiriú ag Raidió na Life, cloistear gné phearsanta scéal Chomhdháil Náisiúnta na Gaeilge—cén saghas duine a bhí gníomhach léi, cén ról a bhí aici in eangach chasta na n‑eagraíochtaí deonacha Gaeilge, agus cén oidhreacht a d’fhág sí ar bheatha daoine agus ar shaol na Gaeilge i gcoitinne.

Aonghus Ó Lochlainn, eagarthóir Scéal Chomhdháil Náisiúnta na Gaeilge, a léirigh agus a láithrigh an tsraith seo. I measc na nguthanna a chíorann scéal na Comhdhála le hAonghus tá Helen Ó Murchú, Julian de Spáinn, agus Seán Ó Cuirreáin, is iad ag léiriú a dtuairimí agus a saintaithí ar an scéal.

Fiosraíonn an tsraith an deireadh obann a tháinig leis an eagraíocht chomh maith. Féachtar ar na haighnis a bhí le brath idir na heagraíochtaí deonacha Gaeilge, an Stát, agus Foras na Gaeilge; cén fáth gur cuireadh deireadh leis an gComhdháil; agus déantar plé freisin ar shuíomh reatha na Gaeilge agus breis agus 5 bliana caite ó chuíchóiriú chinniúnach na hearnála—an níos láidre nó níos laige atá an suíomh anois?

Fuair an tsraith maoiniú ó scéim Fuaim & Fís Údarás Craolacháin na hÉireann.